Isang Quezon City police officer ang kinasuhan ng murder, frustrated murder, at paglabag sa Comprehensive Firearms Law at Omnibus Election Code matapos niyang barilin ang isang van driver sa Barangay Old Balara noong Marso 20. Ang insidente ay nagsimula sa isang away-trapiko na nauwi sa pamamaril.
Ayon kay Police Maj. Don Don M. Llapitan ng Criminal Investigation and Detection Unit (CIDU), ang pulis ay kinilalang si PEMS Randy Enano Tuzon, 48, na residente ng Barangay Kaligayahan, Quezon City. Nakatalaga siya sa Batasan Police Station 6. Base sa imbestigasyon, nagmamaneho sina Ronnie Casero Borromeo, 42, at Reynaldo Hagos, 51, ng kanilang Mitsubishi L300 sa Tandang Sora Avenue bandang 6:30 PM nang muntik silang mabangga ng L300 van ni Tuzon.
Dahil dito, bumaba si Tuzon sa kanyang sasakyan at nagkaroon ng mainit na pagtatalo sa pagitan niya at ng dalawang lalaki. Sa kasagsagan ng alitan, hinampas umano ni Borromeo si Tuzon gamit ang bakal na tubo, dahilan para bumunot ng baril ang pulis at paputukan ang mga biktima.
Si Borromeo ay nagtamo ng maraming tama ng bala at agad na isinugod sa Diliman Hospital, ngunit binawian ng buhay makalipas ang dalawang oras. Si Hagos naman ay tinamaan sa balakang at hita at kasalukuyang ginagamot sa East Avenue Medical Center. Samantala, agad namang sumuko si Tuzon sa mga awtoridad matapos ang insidente.
Ayon kay Police Col. Melecio Buslig, Jr., acting director ng Quezon City Police District (QCPD), nakikiramay sila sa pamilya ng biktima at sisiguraduhin nilang patas at walang kinikilingan ang imbestigasyon upang mapanagot ang may sala.
