Tiniyak ng Presidential Anti-Organized Crime Commission (PAOCC) ang pagsasara ng isang Philippine Offshore Gaming Operator (POGO) hub sa Makati matapos itong salakayin noong Huwebes.
Ayon kay PAOCC Executive Director Usec. Gilbert Cruz, napakalaki ng gusali na kanilang ni-raid, na may pitong palapag at maraming silid na puno ng computer. Dagdag pa niya, lumalabas na aktibo pa rin ang operasyon nito dahil sa malamig pang air conditioning sa ilang palapag nang dumating ang mga awtoridad.
Inaasahan ng mga opisyal na makakakita sila ng humigit-kumulang 600 Pilipino at dayuhan sa loob ng gusali. Ngunit sa kabila ng kanilang pagsalakay, wala silang nadatnang tao sa lugar.
Sinabi ni Cruz na tiyak na ipasasara ang POGO hub na ito. Ayon sa kanya, may hawak nang mga rekord ang mga awtoridad ukol sa nagpapatakbo ng operasyon.
"Alam na natin kung sino ang may hawak ng negosyo, kaya sisiguraduhin nating tuluyan itong maisasara," ani Cruz. Nakikipagtulungan na rin sila sa licensing office ng Makati City upang matiyak na ang mga ganitong POGO hubs ay ganap na ipapasara.
