Sinimulan na ng Commission on Elections (Comelec) nitong Lunes ang pag-iimprenta ng mga balota para sa nalalapit na midterm elections at kauna-unahang parliamentary elections sa Bangsamoro Autonomous Region in Muslim Mindanao (BARRM) sa darating na Mayo 12.
Ang proseso — na sinaksihan nina Comelec chairman George Erwin Garcia, mga kinatawan ng election watchdogs, at ang South Korean election service provider na Miru — ay ginanap sa National Printing Office sa Lungsod ng Quezon.
“Para sa amin sa Comelec, sa National Printing Office, at Miru, ito na ang puntong wala na kaming ibang pagpipilian kundi ipagpatuloy ang halalan,” pahayag ni Garcia sa isang press conference matapos opisyal na simulan ang pag-iimprenta ng mga balota.
Unang iimprentahin nitong Lunes ang mga balota para sa mga lokal at overseas absentee voters, na tanging mga pambansang kandidato lamang ang laman.
Sa 183 na nag-file ng Certificates of Candidacy para sa pagka-senador, 66 lamang ang nakapasok sa opisyal na listahan, habang ang huling listahan ng mga party-list group ay nabawasan sa 155 matapos umatras ang Wage Hike party-list sa kanilang kandidatura para sa House of Representatives.
Kasama rin sa iimprentahin nitong Lunes ang mga balota para sa kauna-unahang halalan sa Bangsamoro, na nagtatampok ng 109 kandidato para sa 65 parliamentary district seats sa BARRM.
Ang mga botante sa BARRM ay gagamit ng dalawang balota sa araw ng halalan — isa para sa parliamentary elections at isa para sa pambansang halalan.
Ayon kay Garcia, tinatayang aabot sa 73 milyong balota ang iimprentahin, kung saan 68 milyon ang nakalaan para sa mga rehistradong botante sa buong bansa na may mga kandidato para sa lokal at pambansang halalan.
Mahigit dalawang milyong balota ang nakalaan para sa halalan sa Bangsamoro, halos isang milyon para sa test ballots, at ang natitira ay para sa lokal at absentee voters.
Muling iginiit ni Garcia na walang sobrang balota na iimprentahin ang Comelec.
