PNP at TikTok magtutulungan laban sa online scams

Pinalakas ng Anti-Cybercrime Group (ACG) ng Philippine National Police (PNP) at TikTok ang kanilang mga hakbang upang labanan ang online scams at sexual exploitation.
Nagdaos ng kolaboratibong pulong ang ACG at ang sikat na short-form video hosting platform sa Camp Crame kahapon upang bumuo ng mga estratehiya laban sa mga umuusbong na banta sa social media platform.
Ayon kay ACG officer-in-charge Col. Rommel Batangan, hindi ligtas ang TikTok sa paggamit bilang kasangkapan ng mga scammer at iba pang cyber criminals, lalo’t isa ito sa mga pinaka ginagamit na social media platform sa buong mundo.
“Ang kolaborasyon na ito sa TikTok ay malaking tulong para mapabilis at mapahusay ang aming cybercrime investigation efforts, na naglalayong lumikha ng mas ligtas at mas maayos na cyberspace para sa lahat,” pahayag niya.
Sa kabilang banda, ipinahayag ng TikTok ang kanilang suporta sa ACG sa pamamagitan ng pagbibigay ng training sessions para sa mga imbestigador nito.
Noong Disyembre 18, nagsagawa ng collaborative meeting ang PNP Anti-Cybercrime Group at TikTok sa ACG Conference Room na matatagpuan sa ACG Building, Camp Crame, Quezon City.
Ayon kay ACG spokesperson Lt. Wallen Mae Arancillo, nakatanggap ang TikTok ng halos 108 reklamo mula sa mga gumagamit nito, karamihan ay may kinalaman sa scam activities.
Ipinaliwanag ni Arancillo na ginagamit ng mga social media user ang TikTok para magbenta ng produkto online, ngunit tinatarget ito ng mga cyber criminals.
“May mga kaso kung saan substandard na produkto ang natatanggap ng mga biktima sa halip na ang item na kanilang binili,” ani Arancillo sa isang panayam.
“Mayroon ding mga pagkakataon na bayad na ang item ngunit hindi ito naihahatid,” dagdag niya.
Bukod sa scams, sinabi rin ni Arancillo na may mga kasong kinasasangkutan ng sexual exploitation materials na nai-post sa TikTok.