Isang dating senador ang bumatikos sa umano’y kawalang-galang na pag-takeover sa pagdinig ng Senado kaugnay ng kontrobersyal na war on drugs ng nakaraang administrasyon.
Sa isang kamakailang pahayag, kinondena ni dating Senador Panfilo Lacson ang naging asal ng dating Pangulong Rodrigo Duterte sa harap ng Senate Blue Ribbon subcommittee noong Lunes, na binanggit niyang parang “sinakop” nito ang mataas na kapulungan ng Kongreso.
Ayon kay Lacson, isang senador lamang ang nagtanggol sa dangal ng Senado mula sa inasal ng dating pangulo sa pagdinig.
“Noong Lunes, 'nilusob' ang Upper Chamber ng dating pangulo ng Republika. Isang tao lamang ang palagiang matapang at matatag na tumindig upang protektahan ang dignidad ng Senado ng Pilipinas," ani Lacson.
"Siya ay isang babaeng laging sumasagot ng 'present' tuwing may roll call. Ang pangalan niya: Risa Hontiveros," binigyang-diin ng dating senador.
Ang pahayag ni Lacson ay sinang-ayunan ni dating Senador Antonio Trillanes IV, na nagsabing "ang tanging liwanag sa pagdinig sa Senado kahapon ay ang matapang na pagtayo ni Sen. Risa laban kay 'Evil Duts.'"
“‘Yan ang lider! Matapang! Matalino! Magaling!” ayon kay Trillanes.
Paulit-ulit na pinagsabihan ni Hontiveros si Duterte na itigil ang pagmumura sa pagdinig sa Senado.
Ang dating pangulo ay maraming beses gumamit ng mga salita ng pagmumura habang ipinapahayag ang kanyang walang-pagsisising tindig sa iligal na droga, lalo na kapag may kinalaman ang mga pulis.
“Lalo na ang pulis, [expletive] itong mga pulis, ‘pag pumasok yan sa pulis sa droga, hindi mo masabi, 'hoy pulis huminto ka'," sabi ni Duterte.
Nag-interject si Hontiveros: "Pasensya na po sa pagputol. Tungkol po sa lenggwahe, pasensya na Sir, baka maaari pong ang resource person ay tumigil sa pagmumura kasi bahay natin itong Senado."
Binigyang-diin din ni Hontiveros na “hindi kailanman” ipinagmamalaki ng mga Pilipino ang war on drugs, at ang mga kwento ng mga biktima nito ay dapat marinig at maging inspirasyon para kumilos ang mga mambabatas.
“Sa lahat ng nagsasabi na ang war on drugs ay parusa daw para sa mga naliligaw ng landas, ang mensahe ko ay ganito: Walang dangal sa parusang gaya ng tokhang,” sabi ni Hontiveros.
“Hinding-hindi dapat ipagmalaki ang tawaging 'The Punisher,' lalo na kung libu-libong inosenteng tao, kabilang na ang mga sanggol, ang namatay sa pangalan mo. Hindi kailanman ipinagmamalaki ng mga Pilipino ang war on drugs na ‘yan,” pagtatapos ni Hontiveros.
