Nanawagan si Senadora Risa Hontiveros kagahapon, Agosto 20, sa Department of Foreign Affairs (DFA) na kanselahin ang pasaporte ng pinatalsik na Mayor ng Bamban, Tarlac na si Alice Guo.
"Ang pagkansela ng kanyang pasaporte ay maglilimita sa kanyang kilos at mas madaling matutunton ang kanyang kinaroroonan. Bukod dito, wala siyang karapatang gumamit ng pasaporteng Pilipino sa simula pa lang," pahayag ni Hontiveros.
Ginawa ni Hontiveros ang apela matapos niyang isiwalat noong Lunes, Agosto 19, na umalis na ng bansa si Guo noong Hulyo 18, patungong Kuala Lumpur, Malaysia.
"Ang mapanlinlang na 'Pilipinang' ito ay naglakas-loob pang gumamit ng pasaporteng Pilipino para makatakas. Dapat itong kaagad na mapawalang-bisa," giit ni Hontiveros.
Sa kanyang talumpati, ipinakita ni Hontiveros ang ebidensyang nagpapakita ng pagpasok ni Guo sa Malaysia at ang kanyang pag-aangkin ng pasaporteng Pilipino. Nabanggit din niya ang mga ulat na nagpapatunay na nakipagkita si Guo sa kanyang pamilya sa Singapore noong Hulyo 21, bago umalis patungong Batam, Indonesia noong Agosto 18.
Binatikos ni Hontiveros ang DFA dahil sa hindi agad pagkansela ng pasaporte ni Guo, kahit na nakumpirmang nakuha ito sa mapanlinlang na paraan.
Binanggit ng senadora na kinumpirma ng National Bureau of Investigation (NBI) noong Hunyo 27 na si Guo at ang Chinese national na si Guo Hua Ping ay iisang tao, base sa magkatugmang fingerprint. Matagal nang umiiwas si Guo sa mga pagdinig ng Senado kaugnay ng kanyang diumano'y pagkakasangkot sa ilegal na Philippine offshore gaming operators (POGOs) mula Hunyo 26.
Sa kabila ng mga pagsisiwalat ni Hontiveros at kumpirmasyon ng mga ahensya, iginiit ng abogado ni Guo, na si Stephen David, na nasa Pilipinas pa rin si Guo.
Nahaharap din si Guo sa reklamong trafficking na may kaugnayan sa isang na-raid na POGO sa kanyang bayan. Gayunpaman, wala pang warrant of arrest na inilalabas laban sa kanya dahil kakasumite pa lang ng Department of Justice (DOJ) ng reklamo para sa resolusyon. Kung itutuloy ang kaso, dadalhin ito sa korte, kung saan magpapasya ang hukom kung mag-iisyu ng warrant.
