Lima ang sugatan matapos bumangga ang isang dump truck sa bahay sa Corazon Aquino Avenue, Barangay San Gabriel, Teresa, Rizal. Nangyari ito ng madaling araw ng April 22, 2025.
Ayon sa Teresa Police, ang truck ay galing sa Antipolo at papunta sana sa Morong, Rizal. Ayon sa drayber, nawalan daw ito ng preno kaya hindi na niya nakontrol ang truck na puno ng buhangin, kaya ito bumangga sa isang bahay.
Nasugatan ang drayber at pahinante ng truck. Na-trap pa ang drayber sa loob ng sasakyan at kinailangang i-rescue. Tatlong tao sa bahay din ang nasaktan – isang mag-asawa at ang kanilang anak. Nahirapan ang rescuers na ilabas sila dahil natabunan ang pintuan, kaya dumaan sila sa bubong.
Ayon kay Mila Tamayo, isa sa mga biktima, nanonood lang sila ng TV sa sala nang biglang bumagsak ang ikalawang palapag ng bahay. Akala raw nila ay lumindol, at ngayon ay may mga pasa at pananakit pa rin ng katawan.
Nakauwi na sa kanilang bahay ang mga sugatan matapos sumailalim sa medical check-up. Wala nang reklamo laban sa drayber dahil pumayag ang kumpanya ng truck na sagutin lahat ng gastusin sa ospital at pag-aayos ng bahay.
