Ang National Bureau of Investigation (NBI) ng Pilipinas ay nagbukas ng imbestigasyon ukol sa mga kaso ng pekeng birth certificates na nakuha ng mga Chinese nationals sa Davao. Ayon sa NBI, may mga lokal na pamahalaan sa Davao na tumulong sa mga Chinese na makakuha ng mga pekeng dokumento. Ang isyung ito ay nagdulot ng matinding alalahanin ukol sa integridad ng sistema ng identification sa bansa.
Ayon kay Archie Albao, ang hepe ng NBI sa Southeastern Mindanao, maliban sa Santa Cruz, Davao del Sur, may iba pang mga lugar na hinihinalang sangkot sa pekeng birth certificate scheme. Bagamat hindi pa tinutukoy ang iba pang mga lugar, sinabi ni Albao na mayroon nang mga mahalagang impormasyon ang NBI at maglalabas pa sila ng mga detalye kapag nakumpleto na ang imbestigasyon.
Naunang nagsampa ang NBI ng 66 counts ng criminal charges laban sa mga public officials mula sa Santa Cruz Municipal Civil Registry. Kabilang sa mga akusasyon ang corruption, forgery, at violating civil registry laws. Kasama sa mga isinampang kaso ang mga Chinese nationals na sinasabing kumuha ng mga pekeng birth certificate mula sa mga awtoridad.
Sa mga unang imbestigasyon, tinatayang umabot sa 1,500 fake birth certificates ang na-issue sa Santa Cruz mula 2018 hanggang 2021. Ayon pa kay Albao, ang bilang na ito ay maaaring tumaas pa dahil hindi pa tapos ang pagsusuri sa mga records bago 2018 at pagkatapos ng 2021.
Dahil sa mga bagong natuklasan, iniutos ni Jaime Santiago, ang pinuno ng NBI, na magsagawa ng malawakang pagsusuri sa mga lokal na tanggapan ng civil registry sa buong bansa. Lalo na sa mga rehiyon ng Luzon at Visayas, upang alamin kung mayroong iba pang network ng pekeng dokumento na kumakalat sa buong Pilipinas.
