Naapula na ang sunog sa loob ng First Industrial Park sa Tanauan City, Batangas. Tinatayang 100 Chinese brand cars ang nasira matapos madamay ang kanilang storage nang magsimula ang sunog sa kalapit na pabrika ng mantika.
Ayon kay F/Sr. Supt. Dennis Molo, Batangas Provincial Fire Marshal, ang sunog ay maaaring nagsimula sa spent bleaching earth (SBE) chemicals sa stockyard ng pabrika. Ang SBE ay isang flammable at hazardous chemical na by-product ng langis na ginagamit sa refining process.
Mabilis kumalat ang apoy mula sa stockyard at umabot sa isang open space kung saan nakaparada ang mga bagong sasakyan, kabilang ang mga Chinese brand cars. Ayon kay Governor Hermilando Mandanas, higit sa 1,000 sasakyan ang nakaparada sa lugar, at 100 sa mga ito ang nasunog.
May mga scrap drums na may natitirang kemikal na naging sanhi ng mabilis na pagkalat ng apoy. Gayunpaman, naprotektahan ang isang warehouse dahil sa kanilang fire system, kaya’t hindi gaanong naapektuhan ang loob nito.
Walang iniulat na nasaktan sa insidente, kahit na umabot ang sunog sa third alarm. Patuloy pa rin ang imbestigasyon ng mga awtoridad ukol sa sanhi ng sunog.
