Nakakaaliw ang kwento ni Puti, isang aspin na dating stray dog pero ngayon ay parang opisyal na staff na sa isang hardware store sa Montalban, Rizal. Viral si Puti sa social media dahil sa suot niyang ID, kapareho ng mga empleyado ng tindahan. Isa itong patunay na kahit aso, pwedeng maging parte ng pamilya sa trabaho!
Makikita sa video na kuha ni Bayan Patroller Jackielyn Valencia, isa sa mga empleyado, si Puti ay nakikisama at nagpapahinga sa break time kasama ang kanyang mga "co-workers." Kwento niya, napakabait daw ni Puti at hindi ito nangangagat kahit customers pa ang lumapit sa kanya.
Dati raw ay isa lang siyang maruming asong gala na palaging nasa labas ng hardware, ayon sa empleyado na si Edgardo Bosito. Taong 2023 nang una nilang pakainin si Puti. Mula noon, palagi na raw itong nakaabang sa kanila at sinusundan sila papasok at pauwi. Sobrang attached na rin si Puti sa mga tao roon.
Dahil sa pagiging consistent ni Puti sa pagpunta, naisip ng mga admin staff na bigyan siya ng sariling ID noong Nobyembre 2024. Ayon sa supervisor na si Anylyn Millapre, hindi ito official employee ID pero ginawa ito bilang pagkakakilanlan kay Puti bilang opisyal na aso ng hardware.
Ngayon, may sarili nang higaan, food at water bowl si Puti sa labas ng shop. Regular siyang pinapaliguan at bakunado kaya walang dapat ikabahala ang mga customer. Para sa mga empleyado, naging source ng good vibes si Puti, at naging parte na siya ng araw-araw nilang buhay sa trabaho.
