Isang holdaper sa Talisay, Cebu ang nag-sorry muna bago nagtutok ng baril sa isang taxi driver at kinuha ang P1,500 cash na kita nito. Ayon sa ulat ng TV5’s Frontline Pilipinas, isang dashcam video ang nakahuli sa insidente sa Brgy. Tabunok noong March 25. Makikita sa video na kinakabahan ang suspect, nagkunwaring may kausap sa phone, at pagkatapos ay itinutok ang baril sabay sabing, “Holdup ‘to, boss. Sorry, boss, pera lang ang akin kung ‘di mo gusto mamatay.”
Matapos ang krimen, agad bumaba ng taxi ang suspect at tumakas dala ang pera. Hinahabol na siya ngayon ng mga awtoridad. Samantala, hindi pa makapagtrabaho ang taxi driver dahil sa trauma. “Natakot talaga ako. ‘Di biro-biro ‘yung baril na tinutok sa’kin. May mga anak pa ako, maliit pa sila,” sabi niya sa panayam.
Maraming netizens ang nagulat at natawa sa ginawa ng holdaper na nag-sorry muna bago magnakaw. “Haha, nag-sorry pa,” komento ng isang netizen. Ayon sa batas, maaaring kasuhan ng robbery ang suspect dahil gumamit siya ng baril, pananakot, at puwersa para nakawin ang pera ng taxi driver. Depende sa tindi ng karahasan, maaari siyang makulong mula 12 hanggang 40 taon sa ilalim ng reclusion perpetua o reclusion temporal.
