Isang binatilyo mula sa India na si Lalit Patidar, 18, ang nagtala ng Guinness World Record para sa pinakabuhok na mukha. Mayroon siyang 201.72 buhok bawat sentimetro, na nangangahulugang mahigit 95% ng kanyang mukha ay natatakpan ng buhok.
Si Patidar ay may napakabihirang kondisyon na tinatawag na hypertrichosis, o kilala rin bilang werewolf syndrome, na nagdudulot ng abnormal na paglago ng buhok sa katawan. Sa buong mundo, mayroon lamang humigit-kumulang 50 kaso ng ganitong kondisyon na naitala mula pa noong Middle Ages.
Bagamat nagdala ito ng negatibong reaksyon mula sa iba — tulad ng mga estrangherong napapatingin sa kanya at mga batang natatakot noong una nilang makita siya sa paaralan — natutunan ni Patidar na tanggapin ang kanyang sarili. "Nang makilala nila ako, naintindihan nilang hindi naman ako naiiba sa kanila. Sa panlabas lang ako iba, pero sa loob ay hindi," pahayag niya.
Sa pagtanggap niya sa kanyang pagkatao, nagsimula siyang mag-vlog tungkol sa kanyang buhay sa YouTube. Sa pagtaas ng kanyang kasikatan, naimbitahan siya sa Italian TV show na Lo Show dei Record, kung saan sinukat ang kapal ng buhok sa kanyang mukha upang opisyal na makuha ang Guinness World Record.
Matapos makuha ang titulo, masayang sinabi ni Patidar na, "Hindi ko alam kung ano ang sasabihin ko dahil sobrang saya ko sa pagkilalang ito." Sa kabila nito, may ilan pa ring nagsasabi sa kanya na tanggalin ang kanyang buhok sa mukha. Ngunit matatag na sagot ni Patidar, "Masaya ako sa itsura ko at ayokong baguhin ito."
