Maghanda na, mga Avatar fans! Ang mundo ng Avatar: The Last Airbender ay lalawak pa sa Nickelodeon! Opisyal nang greenlit ang bagong sequel series na Avatar: Seven Havens. Ang animated na palabas ay magkakaroon ng 26 episodes na hahatiin sa dalawang seasons. Ang balitang ito ay dumating kasabay ng pagdiriwang ng ika-20 anibersaryo ng The Last Airbender, na unang ipinalabas noong Pebrero 21, 2005.
Sa ilalim ng Avatar Studios ng Nickelodeon Animation, kasalukuyang nasa production na ang Seven Havens. Ang mga co-creators ng Avatar, sina Michael DiMartino at Bryan Konietzko, ang mamumuno sa proyekto. Ang kwento ay magaganap pagkatapos ng mga pangyayari sa Legend of Korra, kung saan isang batang Earthbender ang matutuklasang siya ang bagong Avatar matapos ni Korra. Ngunit sa bagong mundong ito, ang pagiging Avatar ay hindi isang biyaya—sa halip, itinuturing siyang panganib sa sangkatauhan. Hinahabol siya ng mga kaaway mula sa mundo ng tao at espiritu, kaya’t kailangan niyang, kasama ang kanyang matagal nang nawawalang kambal, tuklasin ang kanilang pinagmulan at iligtas ang Seven Havens bago tuluyang bumagsak ang natitirang bahagi ng sibilisasyon.
Sa isang pahayag, sinabi nina DiMartino at Konietzko, "Noong ginawa namin ang original series, hindi namin inakala na palalawakin pa namin ang mundo nito pagkatapos ng ilang dekada. Ang bagong kabanata ng Avatarverse na ito ay puno ng fantasy, misteryo, at mga bagong amazing characters. Maghanda sa isang panibagong epic at emotional na adventure!"
Ang Seven Havens ang magiging ikatlong animated Avatar series, kung saan sina DiMartino at Konietzko ang co-creators at executive producers, si Ethan Spaulding ang isa pang executive producer, at si Sehaj Sethi ang co-executive producer.
Excited ka na ba sa bagong Avatar?
