Noong Pebrero 14, 2025 (Biyernes), inilabas ng folk-pop band na Ben&Ben ang kanilang pinakabagong single na pinamagatang “Tomorrow With You.” Ito ang ika-12 track mula sa kanilang ikatlong studio album na The Traveller Across Dimensions, na unang inilabas noong Nobyembre 29, 2024. Kasama ng single release ang live version nito na naitala sa solo concert ng “Pagtingin” hitmakers noong Disyembre 14, 2024, sa SM Mall of Asia Arena sa Pasay City.
Ayon sa pahayag ng banda, ang awitin ay “sumasalamin sa tibay ng pagmamahal sa gitna ng mga hamon sa buhay.” Ang inspirasyon nito ay ang mga taong naging bahagi ng kanilang paglalakbay bilang indibidwal at bilang banda. “Ang awit na ito ay nagpapakita ng aming paglago, sa personal at malikhaing aspeto, kasama ang aming pamilya, kaibigan, at mga mahal sa buhay,” pahayag ng banda.
“Dahil malayo na rin ang aming narating sa iba’t ibang dimensyon ng aming buhay, dala ng ‘Tomorrow With You’ ang karunungan at pagiging hinog na natutunan namin sa mga karanasang ito, at inilapat ito sa isang love song na puno ng emosyon,” dagdag ng banda.
Ang live version ng kanta ay espesyal para sa banda dahil naniniwala silang “ito ay nagbibigay sa mga tagapakinig ng pagkakataong maranasan ang isang Ben&Ben concert sa mas personal na antas.” Tinawag nila itong isang “natatanging audiovisual storytelling adventure” na inaasahan nilang magiging bahagi ng mga kwento ng buhay ng kanilang tagapakinig.
Ipinaliwanag din ng banda na ang live performance ay “maingat na naitala sa isang konsiyerto na mahalaga para sa amin at sa aming Liwanag [fans].” Idinagdag pa nila na ang palabas ay sumasalamin sa lyrics ng kanta: “yakapin ang mahihirap na panahon kasama ka, hanggang sa sila’y maglaho.” Ang konsiyerto umano ay isang malaking milestone matapos ang isang taon na puno ng mga pagsubok, pagkabigo, at aral.
“Tomorrow With You” ay iniprodyus ng musikero mula sa Indonesia na si Petra Sihombing. Ang kanta ay pinagsama ang influensya ng ‘70s singer-songwriter pop, jazz, at classic soul na may waltz-like rhythm, na nagbigay ng nakakaaliw na soundscape para sa mga sandaling kasama ang iyong mahal sa buhay.
“Ang aming mabuting kaibigan mula sa Indonesia, si Petra Sihombing, ang nagprodyus ng track,” pahayag ng banda. “Sinubukan niyang ipakita ang taos-pusong emosyon at ang unti-unting paglago ng kanta sa dynamics at frequencies, na sa tingin namin ay nagawa niya nang maayos.” Bukod dito, ang kanilang kaibigang si Ziv, na nagprodyus din ng iba pang kanta sa album, ang nagdagdag ng saxophone parts na nagbigay ng bagong nuance sa kanta.
Panoorin ang live performance video ng “Tomorrow With You” mula sa kanilang konsiyertong The Traveller Across Dimensions sa ibaba:
