Matapos ang biglaang pagpanaw ni Barbie Hsu, nagbahagi ng taos-pusong pagpupugay ang kanyang Meteor Garden co-star na si Jerry Yan sa Chinese social media platform na Weibo noong gabi ng Pebrero 3. Pumanaw si Hsu sa edad na 48 dahil sa influenza-induced pneumonia habang nasa Japan para sa pagdiriwang ng Lunar New Year, ayon sa kumpirmasyon ng kanyang kapatid na si Dee Hsu.
Sa kanyang post, isinulat ni Yan::
"Nagpapasalamat ako na nakilala kita. Sa iyong mga taong puno ng kawalang-malay at saya, madalas mong sabihin, tratuhin ang bawat araw na tila ito na ang huli. Upang maging masaya. Sana sa pagkakataong ito ay maglakad ka nang dahan-dahan. Mula ngayon, sa kabilang mundo, wala nang alalahanin at magiging payapa ang mga taon."
Isang Iconic na Tambalan sa 'Meteor Garden'
Si Hsu at Yan ay naging simbolo ng isang hindi malilimutang tambalan sa 2001 Taiwanese drama series na Meteor Garden. Ang 27-episode series ay naging isang napakalaking tagumpay, kaya’t nagkaroon pa ito ng 4-episode na supplementary series na Meteor Rain at isang 31-episode sequel na Meteor Garden II. Dahil sa phenomenal na kasikatan ng kanilang palabas, lumawak ang interes ng maraming manonood sa Asian telenovelas.
Sa serye, ginampanan ni Hsu si Shan Cai, isang mahirap ngunit matapang na estudyante sa isang paaralan para sa mga mayayaman. Doon niya nakilala ang "F4"—apat na gwapong estudyante mula sa mayayamang pamilya:
- Jerry Yan bilang Dao Ming Si
- Vic Chou bilang Huaze Lei
- Ken Chu bilang Ximen
- Vanness Wu bilang Meizuo
Sa simula, binully si Shan Cai ng F4 dahil sa kanyang estado sa buhay, ngunit kalaunan ay naging magkaibigan sila. Ang dating inis at galit ay nauwi sa pag-ibig, hanggang sa tuluyang nahulog ang loob nina Dao Ming Si at Shan Cai sa isa't isa.
Nagbigay din ng paggunita ang dating kasamahan ni Hsu na si Ken Chu, kung saan nag-post siya sa Instagram Stories ng isang throwback photo ng cast ng Meteor Garden bilang pagpupugay sa kanyang yumaong co-star. Samantala, sa oras ng paglalathala ng balitang ito, wala pang pahayag sina Vic Chou at Vanness Wu tungkol sa pagkawala ni Hsu.
