Sa unang D23 event ng Brazil nitong weekend, nagbahagi ang Marvel Studios ng isang espesyal at pinalawig na trailer para sa kanilang upcoming na pelikulang Thunderbolts na pinagbibidahan nina Florence Pugh, Sebastian Stan, at David Harbour.
Si Harbour, na gumanap bilang si Red Guardian sa pelikula, ang nagpakita ng trailer sa mga dumalo sa event. Inaasahan na ang Thunderbolts ay magiging sagot ng Marvel sa Suicide Squad ng DC — kung saan ang parehong mga grupo ay binubuo ng mga antiheroes at mga kontrabidang karakter mula sa kanilang sariling mga uniberso. Susundan ng pelikula ang grupo habang isinasagawa nila ang kanilang mga peligrosong misyon para sa sangkatauhan. Ang kwento ay batay sa comic series ni Kurt Busiek na may parehong pangalan. Si Jake Schreier ang nagdidirek ng pelikula, habang si Kevin Feige ang nagsisilbing producer kasama ang mga executive producers na sina Louis D’Esposito, Brian Chapek, Jason Tamez, at Scarlett Johansson. Si Eric Pearson, na nagtrabaho sa Black Widow, Thor: Ragnarok, Transformers One, at The Fantastic Four: First Steps, ang nagsulat ng script kasama sina Lee Sung Jin ng Beef at Joanna Calo ng The Bear.
Inaasahan na muling gaganap si Pugh bilang si Yelena Belova mula sa Black Widow, si Stan bilang ang Winter Soldier, si Olga Kurylenko bilang Taskmaster, si Hannah John-Kamen bilang si Ghost, si Wyatt Russell bilang si John Walker, at si Julia Louis-Dreyfus bilang ang mastermind na si Valentina Allegra de Fontaine. Ang superhero film ng Marvel ay inaasahang ipapalabas sa mga sinehan sa darating na Mayo 2, 2025. Panoorin ang pinalawig na trailer sa itaas.
