Ang 29-anyos na lalaki ay nasugatan matapos sakmalin ng buwaya sa loob ng hawla sa Kabug Mangrove Park and Wetlands sa Siay, Zamboanga Sibugay, kaninang umaga. Makikita sa video na tinutulak pa ng buwaya ang lalaki sa tubig at binabalibag siya. Ang mga tao sa paligid ay nagulat at napapasigaw sa kanilang nakikita.
Ayon sa pulisya, pumasok ang lalaki sa hawla at lumapit sa buwaya. Inaasahan niyang magiging safe lang siya at magiging laruan ang buwaya. “Nagpasyal siya sa area then nakita niya yung crocodile, in-expect niya na laruan lang. Pumunta siya sa bakod ng crocodile, pumasok siya, tapos nakagat siya,” sabi ni PSSgt. Joel Sajolga ng Siay MPS.
Sa tulong ng pulisya, municipal disaster rescue team, at ng may-ari ng buwaya, nailigtas ang lalaki. Isinugod siya sa ospital at nagtamo ng mga sugat sa kanyang binti at balikat. “Okay naman siya at naisugod sa ospital kanina,” ani Jonalyn Vidad, isang saksi sa insidente.
Ayon sa pulisya, may mga nagbabantay naman sa park, pero mabilis ang aksyon ng lalaki sa pagpasok sa hawla ng buwaya. May deperensya rin umano sa pag-iisip ang biktima, ayon sa mga otoridad.
