Isang ina at kaniyang anak ang nasawi matapos ma-trap sa sunog sa kanilang bahay sa Rosales, Pangasinan noong Martes ng umaga. Ayon sa Bureau of Fire Protection (BFP), nakalabas ng bahay ang ibang mga tao, kasama na ang ginang. Subalit, bumalik siya para iligtas ang kaniyang 10-taong-gulang na anak na deaf and mute na natutulog pa sa loob ng kwarto.
Sinubukan niyang humingi ng tulong ngunit binalikan pa rin ang anak. Kapwa sila hindi na nakalabas ng buhay at natagpuan ang kanilang mga labi sa kwarto kung saan sila na-trap. Isang senior citizen naman ang sugatan sa insidente, ngunit hindi pa matukoy kung gaano kalala ang mga sugat.
Patuloy na iniimbestigahan ang sanhi ng sunog, pero ayon sa mga awtoridad, maaaring nagkaroon ng spark o pagputok sa katabing poste ng bahay ng mga biktima. Dahil dito, kumalat ang apoy at mabilis na tinupok ang kanilang bahay. Ang kanilang tahanan ay gawa sa mga light materials, kaya't madaling nasira.
Dahil sa mabilis na pagkalat ng apoy, nadamay rin ang apat na katabing gusali at mga bahay. Sa ngayon, tinatayang umaabot sa P2.5 milyon ang pinsala na dulot ng sunog, ayon sa BFP.
Sa ganitong insidente, mahalaga ang mga hakbang upang siguraduhin ang kaligtasan ng mga PWD sa oras ng sunog, tulad ng mga evacuation plans na naaayon sa kanilang pangangailangan.
