Isang suspek sa droga ang nagturo sa kanyang dalawang kaibigan na sangkot umano sa pagpatay sa isang Slovak na turista na si Michaela Mickova na natagpuan patay sa isang abandonadong kapilya sa Barangay Balabag, Boracay.
Ang suspek na kinilalang si alias Mik, 28 taong gulang, ay nahuli sa isang anti-drug operation noong Marso 14, dalawang araw matapos matagpuan ang bangkay ni Mickova.
Habang nasa kulungan, inamin ni Mik na nababagabag siya sa nangyari kaya nagpasya siyang tumestigo laban sa kanyang mga kaibigang sina Jelo at JR. Ayon sa kanya, noong Marso 10, nag-inuman sila at napadpad sa abandonadong kapilya kasama si Mickova.
Ikinuwento ni Mik na nakita niyang hinawakan ni JR si Mickova at tinamaan ito sa ulo ng isang piraso ng kahoy, dahilan ng kanyang pagkahulog at pagkawala ng malay. Sinabi rin niyang nakita niya si Jelo na may nakababa nang pantalon bago siya umalis sa lugar.
Dalawang araw matapos ang insidente, laking gulat ni Mik nang malamang natagpuan ang bangkay ni Mickova sa kapilya.
