Kinoronahan si Chiara Mae Gottschalk, isang 17-anyos na Filipina-German mula Camarines Norte, bilang Miss Teen Universe Philippines 2025 noong Enero 19, 2025, sa German Club Manila. Siya ang magiging kinatawan ng Pilipinas sa Miss Teen Universe 2025, ngunit wala pang opisyal na anunsyo kung kailan at saang bansa gaganapin ang pageant. Ayon kay Chiara, labis siyang nasorpresa sa karangalang natanggap niya.
Unang beses pa lang ni Chiara sumali sa pageantry nang makuha niya ang first runner-up title sa Miss Teen International Philippines. Aniya, ang karanasang ito ang nagturo sa kanya na ang pagkatalo ay hindi katapusan, kundi isang bagong oportunidad. Mabilis ang naging redirection ng kanyang journey nang ialok sa kanya ni Charlotte Dianco, ang National Director ng Miss Teen Universe Philippines, ang pagkakataong maging kinatawan ng bansa sa prestihiyosong international pageant.
Bukod sa kanyang pageant training, nais ni Chiara na mas maunawaan ang kulturang Pilipino bilang bahagi ng kanyang paghahanda. Plano niyang maglakbay sa iba’t ibang bahagi ng Pilipinas upang matutunan ang mga kaugalian at tradisyon ng bansa, na magagamit niya upang mas maipakilala ang tunay na diwa ng pagiging Pilipino. Malaki rin ang suporta ng kanyang pamilya sa kanyang journey, na naging pundasyon ng kanyang tiwala sa sarili.
Ayon kay Chiara, ang kanyang pagsali sa pageant ay isang paraan para mapalakas ang kanyang self-confidence. Sa kabila ng pagiging anak ng isang dating beauty queen, hindi niya inakala na susunod siya sa yapak nito. Ngunit dahil sa suporta ng kanyang pamilya at mentors, natagpuan niya ang lakas ng loob na magpatuloy at umangat.
Hawak ni Chiara ang adbokasiya para sa inclusivity at empowerment ng kabataan, lalo na ang mga nakararanas ng diskriminasyon. Bilang isang Filipina-German, nais niyang ipakita na ang pagiging mixed race ay isang lakas, hindi kahinaan. Determinado siyang magbigay-inspirasyon sa mga kabataan at ipakita ang galing ng Pilipinas sa international stage.
